புதுடில்லி: ராணுவம் தனது செயல்பாடுகளை முன்பு போலவே மேற்கொண்டு வருவதாகவும், கொரோனா வைரஸ் நோயால், அதன் தயார்நிலை பாதிக்கப்படவில்லை என்றும் ராணுவ தளபதி மனோஜ் முகுந்த் நரவனே கூறியுள்ளார்.
இது குறித்து செய்தியாளர்களிடம் மனோஜ் முகுந்த் பேசியதாவது: வழக்கமான நடவடிக்கைகள் சிலவற்றை ஒத்திவைத்திருக்கிறோம். நிலைமை சீரானதும் அவற்றை மாற்றியமைப்போம். நாடு பெருந்தொற்றுக்கு எதிராக போராடி வரும் வேளையில், எல்லையை பாதுகாப்பாக வைத்திருப்பது எங்களின் முழு பொறுப்பு. தற்போதைக்கு கொரோனா வைரஸை (கோவிட்-19) எதிர்ப்பதே எங்கள் நோக்கம். முன்னெச்சரிக்கை நடவடிக்கைகளை மேற்கொள்வது, ஊரடங்கு உத்தரவு நடவடிக்கைகளை திறம்பட பின்பற்றுவது, எதிர்கால சூழ்நிலைக்கு சொந்த ஆதாரங்களைத் தயார்ப்படுத்துவது போன்றவற்றில் கவனம் செலுத்தி வருகிறோம்.
